މެދު އިރުމަތީގެ ހަނގުރާމަ: ނުވިސްނައި ތިއްބާ ރާއްޖެ ކަޅު ވިލާގަނޑެއްގެ ދަށަށް!

މެދުއިރުމަތީގެ މަސްރަހު ހޫނުވެ، އެމެރިކާ އާއި އިޒްރާއީލުން އީރާނަށް އަމާޒުކޮށް ހަމަލާތައް ދޭން ފެށުމަކީ ދުނިޔޭގެ ޗާޓުން ކިތަންމެ ދުރުގައި އޮތް ނަމަވެސް، ދިވެހިރާއްޖޭގެ އިގްތިސާދީ އުދަރެހަށް ކަޅު ވިލާގަނޑެއް ކުރިމަތިކުރުވާނެ ކަމެކެވެ. މިއީ ހަމައެކަނި ސިޔާސީ ނުތަނަވަސްކަމެއް ނޫނެވެ. މިއީ ރާއްޖޭގެ ލޭނާރު ކަމަށްވާ ފަތުރުވެރިކަމާއި، ކާބޯތަކެތީގެ ރައްކާތެރިކަމާއި، މާލީ ހަމަޖެހުމަށް އޮތް ސީދާ ނުރައްކަލެކެވެ. 

މެދުއިރުމަތީގެ މަސްރަހު މިވަގުތު އޮތް ނުތަނަވަސް ހާލަތަކީ ދުނިޔޭގެ އިގްތިސާދީ ޗާޓަށް ބޮޑެތި ބަދަލުތަކެއް އަންނާނެ ކަމެކެވެ. ވަކިން ހާއްސަކޮށް، ރާއްޖެ ފަދަ ބޭރުގެ ވަސީލަތްތަކަށް ބަރޯސާވާ ގައުމަކަށް އޭގެ ރިހުން ވަރަށް ބޮޑަށް އިހުސާސް ކުރަންޖެހޭނެއެވެ.

ދުނިޔޭގެ ޖިއޯޕޮލިޓިކްސް އަށް އަންނަ ކޮންމެ ލޮޅުމަކީ ރާއްޖޭގެ ކޮންމެ ގޭބިސީއަކާ ގުޅިފައިވާ ކަމެކެވެ. އީރާނުގެ ވައިގެ ސަރަހައްދުގައި އިވޭ ބޮމުގެ އަޑުތަކަކީ ރާއްޖޭގެ ފަތުރުވެރިކަމުގެ އުޑުމަތި ބަނަކޮށްލާނެ “އިގްތިސާދީ ތޫފާނެއްގެ” ފެށުމެވެ. އެ ތޫފާނުގައި އެންމެ ބޮޑު އަސަރެއް ކުރާނީ ދިވެހިންގެ ލޭނާރަށެވެ. ޓުއަރިޒަމަށެވެ. 

ވައިގެ މަގުތައް ބަންދުވުމާއި ޓުއަރިޒަމް ހުއްޓުން!

ރާއްޖޭގެ އިގްތިސާދު ބިނާވެފައިވަނީ ބައިނަލްއަގުވާމީ ދަތުރުފަތުރުގެ މައްޗަށެވެ. އީރާނުގެ ވައިގެ ސަރަހައްދަކީ ޔޫރަޕްގެ މާކެޓްތަކުން ރާއްޖެއަށް އަންނަ ފްލައިޓްތަކުގެ މައިގަނޑު “ހައިވޭ” އެވެ. ހަމަލާތަކުގެ ސަބަބުން މި ސަރަހައްދުގެ އުޑުމަތި ނުރައްކާތެރިވެ، އެއާލައިންތަކުން ދަތުރުތައް ހުއްޓާލަން ޖެހުމަކީ ރާއްޖެއަށް އަންނަ ފަތުރުވެރިންގެ އަދަދު ކުއްލިއަކަށް ދަށްވާނެ ސަބަބެކެވެ. މެދު އިރުމަތީގެ ގިނަ ގައުމުތަކަކީ އެމެރިކާގެ އަސްކަރީ މަރުކަޒުތައް ހުރި ތަންތަނަށް ވުމުން ރައްދުގައި އީރާނުން ދޭ ހަމަލާތައް އަމާޒުވެފައި ވަނީ ވެސް މި ތަންތަނަށެވެ. ދުބާއީ އާއި ދޯހާއަކީ ޔޫރަޕުން ރާއްޖެ އަންނަ އެތައް ފަތުރުވެރިންގެ ޓްރާންސިޓެވެ. އެ ސަރަަހައްދުތަކުގެ ވައިގެ މަގު މިހާރު ވެސް ވަނީ ބަންދުކޮށްފަ އެވެ. 

 އެމިރޭޓްސް، ގަތަރު އެއާވޭސް، އަދި އިއްތިހާދު ފަދަ “މިޑްލް އީސްޓަން ހަބް” ތަކުން ކުރާ ދަތުރުތައް މެދުކެނޑުމަކީ ރާއްޖޭގެ ރިސޯޓްތަކުގެ އޮކިއުޕެންސީ އެއްފަހަރާ ވެއްޓިގެންދާނެ ކަމެކެވެ. ހާއްސަކޮށް މިއީ ރާއްޖޭގެ ޓުއަރިޒަމްގެ އެންމެ ޕީކް ސީޒަނެވެ. ރާއްޖޭގައި މިހާރު ވެސް ޔޫރަޕްގެ އެތައް ހާސް ޓުއަރިސްޓުން އެބަ ތިއްބެވެ. އޭގެ ތެރެއިން ގިނަ ބަޔަކު މިހާރު ވެސް އެ ތިބީ ރާއްޖޭގައި ތާށިވެފައެވެ. ގިނަ ފްލައިޓްތަކެއް ދަނީ ކެންސަލްކުރަމުންނެވެ. މީގެ އިތުރުން، ދަތުރުގެ ރޫޓުތައް ބަދަލުކޮށް، ދިގު މަގުތަކުން ދަތުރުކުރަން ޖެހުމުން ޓިކެޓްގެ އަގު އަތްނުފޯރާ ފަށަށް އުފުލި، މެދު ފަންތީގެ ފަތުރުވެރިންނަށް ރާއްޖެއަކީ “ބޮޑު ހަރަދެއް” ކުރަންޖެހޭ މަންޒިލަކަށް ވެގެންދާނެއެވެ.

ކާބޯތަކެތީގެ ޗެއިން މެދުކެނޑުމާއި އިމްޕޯޓަށް އޮތް ނުރައްކާ ބޮޑު!

ރާއްޖެއަށް ބޭނުންވާ ޒަރޫރީ ކާބޯތަކެތީގެ ބޮޑު ބައެއް އަންނަނީ ކަނޑުމަގުންނެވެ. ހަނގުރާމައިގެ ސަބަބުން މުދާ އުފުލާ ބޯޓުފަހަރުގެ އިންޝުއަރެންސް ޕްރީމިއަމްތައް ބޮޑުވުމާއި، ދަތުރުކުރާ މަގުތައް ބަދަލުކުރަން ޖެހުމަކީ މުދާ އެތެރެކުރުމުގެ ހަރަދު އިންތިހާއަށް އުފުލޭނެ ކަމެކެވެ. މިއީ ކާބޯތަކެތީގެ ރައްކާތެރިކަމަށް އޮތް ބޮޑު ގޮންޖެހުމެކެވެ. ބައިނަލްއަގުވާމީ ބާޒާރުގައި މުދަލުގެ އަގުބޮޑުވުމާ އެކު، ރާއްޖޭގެ ބޭރު ފައިސާގެ ރިޒާވުން ކުރަންޖެހޭ ހޭދަ ބޮޑުވެ، ޑޮލަރުގެ ދަތިކަން ކުރިމަތިވުމުގެ ފުރުސަތު ބޮޑެވެ. މިއީ ރާއްޖޭގެ އިގްތިސާދީ މިނިވަންކަމަށް އޮތް ނުފެންނަ ނުރައްކަލެކެވެ.

ކުރިމަތިެވފައިވާ މި މައްސަލައާ ބެހޭ ގޮތުން ރާއްޖޭގެ ކަމާ ބެހޭ ފަރާތްތަކުން ބުނަމުން ދަނީ ކާބޯތަކެތީގެ ރައްކާތެރިކަން އެބަ އޮތް ކަމަށެވެ.  ދައުލަތުގެ ކަމާ ގުޅޭ ހުރިހާ ފަރާތްތަކާ ގުޅިގެން، ރާއްޖެ އަށް ކޮށްފާނެ އަސަރުތައް ވަރަށް ގާތުން މޮނިޓަ ކުރަމުން އަންނަ ކަމަށާއި އެންމެ އިސްކަންދެނީ ދިވެހިންނަށް ބޭނުންވާ ކާބޯތަކެއްޗާއި އަސާސީ މުދަލުގެ ރައްކާތެރިކަން ކަށަވަރު ކޮށްދިނުން ކަމަށް އިކޮނޮމިކް މިނިސްޓްރީން ވަނީ ބުނެފައެވެ. 

މި ހާލަތުގައި ރާއްޖެ އަށް ބޭނުންވާ މުހިންމު ބާވަތްތަކުގެ ސްޓޮކް ހުސްނުވެ ލިބޭނެ އިންތިޒާމު ހަމަޖެއްސުމަށާއި އިމްޕޯޓް ކުރުމުގައި ހުރި ގޮންޖެހުންތަކަށް ހައްލު ހޯދުމަށް ސަރުކާރުގެ މުއައްސަސާތަކާއި އަމިއްލަ ފަރާތްތަކާ ގުޅިގެން އަޅަންޖެހޭ ފިހަވަޅުތައް އަޅާނެ ކަމަށް އިކޮނޮމިކް މިނިސްޓްރީން ބުނެފައި ވެއެވެ. އެ ކަމަށްޓަކައި ހާއްސަ ކޮމިޓީއެއް ވެސް ސަރުކާރުން މިހާރު ވަނީ އެކުލަވާލާފައެވެ.

ތެލުގެ ބާޒާރުގެ ހަލަބޮލިކަމާއި އާންމު ދިރިއުޅުމުގެ އަގުބޮޑުވުން

ދުނިޔޭގެ ތެލުގެ ސަޕްލައިގެ ބޮޑު ބައެއް ހިއްސާކުރާ މެދުއިރުމަތީގައި ހަނގުރާމައެއް ފެށުމަކީ ތެލުގެ އަގު އިންތިހާއަށް އުފުލޭނެ ކަމެކެވެ. ދުނިޔޭގައި އުފައްދާ ސާފުނުކުރާ ތެލުގެ ގާތްގަނޑަކަށް 20 އިންސައްތަ ކޮންމެ ދުވަހަކު ދަތުރުކުރަނީ އީރާނާއި އޮމާންއާ ދެމެދު އޮންނަ ހޯރްމޫޒް ކަނޑުއޮޅި ހުރަސްކޮށެވެ. އީރާނުން މިހާރު ވެސް ވަނީ މި ވަގުތަށް މި ކަނޑުއޮޅި ބަންދުކޮށްފަ އެވެ. މީގެ ސަބަބުން ދުނިޔޭގެ ތެލުގެ ބާޒާރަށް އަންނާނެ ލޮޅުމަކީ މީގެ ކުރިން ތާރީހު ނުދެކޭ ފަދަ ބޮޑު ލޮޅުމަކަށް ވާނެ ކަމަށް ތަޖުރިބާކާރުން އަންދާޒާކުރެއެވެ.  ރާއްޖެއަށް ބޭނުންވާ ތެލުގެ ބޮޑު ބައެއް އަންނަނީ މެދުއިރުމަތީގެ ގައުމުތަކުން ކަމަށްވާއިރު، މި ރޫޓު ބަންދުވުމަކީ ރާއްޖެއަށް ތެޔޮ ލިބުން ދަތިވެ، “އެނާޖީ ކްރައިސިސް” އެއް ނުވަތަ ހަކަތައިގެ ކާރިސާއެއް ކުރިމަތިވާ ވެދާނެ ކަމެކެވެ.

މި ހާލަތުގައި ތެލުގެ އަގު ދުނިޔޭގެ ބާޒާރުގައި ކުއްލިއަކަށް އުފުލިގެންދާނެއެވެ. ބައެއް އިގްތިސާދީ މާހިރުން ލަފާކުރާ ގޮތުގައި ތެޔޮ ފީފާއެއްގެ އަގު 150 ޑޮލަރަށް ވުރެ މައްޗަށް ދިއުމަކީ އެކަށީގެންވާ ކަމެކެވެ. ރާއްޖޭގެ ހާލަތަށް ބަލާއިރު، މިއީ ކަރަންޓު އުފެއްދުމަށް ބޭނުންވާ ޑީސަލް ގަތުމަށް ދައުލަތުން ކުރަންޖެހޭ ހޭދަ އެތައް ގުނައަކަށް އިތުރުވެ، އެތެރޭގެ އުދުހުންތަކާއި ކަނޑުދަތުރުފަތުރުގެ އަގުތައް އާންމުންނަށް ނުއުފުލޭ މިންވަރަށް ބޮޑުވެދާނެ ސަބަބެކެވެ. ސަޕްލައި މެދުކެނޑިއްޖެ ނަމަ، ރާއްޖޭގެ ރިޒާވްގައި ހުރި ތެލުން ފުއްދާލަން ޖެހޭނީ މަދު ދުވަސްކޮޅަކަށެވެ. މީގެ ނަތީޖާއަކީ މަސްވެރިކަމުގެ އުޅަނދުފަހަރަށާއި ފަތުރުވެރިކަމުގެ ސިނާއަތަށް ބޭނުންވާ ތެޔޮ ނުލިބި، ގައުމުގެ މުޅި އިގްތިސާދީ ހަރަކާތްތައް ހުއްޓުމަކަށް އައުމެވެ.

ރާއްޖެއަކީ ކަރަންޓު އުފެއްދުމަށާއި، ކަނޑުދަތުރުފަތުރަށާއި، މަސްވެރިކަމަށް ތެލަށް ބަރޯސާވާ ގައުމަކަށް ވާއިރު، ތެލުގެ އަގަށް އަންނަ ކޮންމެ ބަދަލަކީ ދިވެހިންގެ ދިރިއުޅުމުގެ ހަރަދު ދެގުނަވާނެ ކަމެކެވެ. ތެލުގެ އަގު ބޮޑުވުމުން ކަރަންޓު ބިލްތައް ބޮޑުވެ، މުދާ އުފުލުމުގެ ހަރަދު އިތުރުވެ، ބާޒާރުގައި ހުރިހާ ތަކެތީގެ އަގު އުފުލިގެންދާނެއެވެ. މިއީ ދައުލަތުން ތެލަށް ކުރާ ސަބްސިޑީގެ ހޭދަ ބިލިއަނުން އިތުރުކޮށް، ގައުމުގެ ބަޖެޓަށް ނުކަތާވަރުގެ ބުރައަކަށް ވެގެންދާނެ ކަމެކެވެ.

ފިނޭންސް މިނިސްޓްރީން ނެރުނު ބަޔާނުގައި ވެސް ބުނީ ރާއްޖެއަށް ބޭނުންވާ ތެޔޮ މައިގަނޑު ގޮތެއްގައި އެތެރެކުރަނީ އޮމާނުން ކަަމަށެވެ. މިހެންކަމުން، ތެލުގެ ސަޕްލައި ކަށަވަރުކުރަން، ސްޓޭޓް ޓްރޭޑިންގް އޯގަނައިޒޭޝަން (އެސްޓީއޯ) އާ ގުޅިގެން ފިޔަވަޅު އަޅަމުންދާނެ ކަމަށް އެ މިނިސްޓްރީން ބުންޏެވެ.

ދައުލަތުގެ މާލިއްޔާ އަށް އޮތް ގޮންޖެހުން ބޮޑު!

ބޭރު ފައިސާގެ ރިޒާވް އެއް ބިލިއަން ޑޮލަރުން މަތީގައި ހުރުމަކީ މި ދަނޑިވަޅުގައި ލިބިފައިވާ ހިތްހަމަޖެހުމެއްގެ ގޮތުގައި ފިނޭންސް މިނިސްޓްރީން ސިފަކުރެއެވެ. މިއީ، އިގުތިސާދީ ލޮޅުންތަކުން އަރައިގަތުމަށާއި، މުދާ އިމްޕޯޓް ކުރުމަށް ބޭނުންވާ ފައިސާ ހަމަޖެއްސުމަށާއި، އިގްތިސާދީ ގޮތުން އަޅަންޖެހޭ ފިޔަވަޅުތައް ހަރުދަނާކަމާ އެކު ތަންފީޒުކުރުމަށް ސަރުކާރަށް ލިބޭ ބާރަކަށް ވެގެންދާނެ ކަމަށެވެ. 

ސަރުކާރުން އަޅަމުންދާ އިގްތިސާދީ އިސްލާހީ ފިޔަވަޅުތަކުގެ ސަބަބުން ރިޒާވްގެ ހާލަތު ވަނީ ބޮޑުތަނުން ރަނގަޅުވެފައެވެ. އެހެން ނަމަވެސް ޔޫޒަބަލް ރިޒާވް ނުވަތަ ދައުލަތުގެ އަމިއްލަ އާމދަނީން އުފެދިފައިވާ ރިޒާވް އަދިވެސް އޮތީ ބަލަހައްޓަންޖެހޭ މިންވަރެއްގައެވެ. މިދަނޑިވަޅުގައި ހަނގުރާމައިގެ ސަބަބުން ފަތުރުވެރިކަމުން ލިބޭ އާމދަނީއަށް ބުރޫއަރައިފިނަމަ، 1.1 ބިލިއަން ޑޮލަރުގެ މި ރިޒާވް ހިފެހެއްޓުމަކީ ބޮޑު ގޮންޖެހުމަކަށް ވާނެއެވެ. ފިނޭންސްގެ އެންމެ ފަހުގެ ތަފާސް ހިސާބުތަކުން ދައްކާ ގޮތުން ޔޫޒަބަލް ރިޒާވް ހުރީ ގާތްގަނޑަކަށް 300 މިލިއަން ޑޮލަރުގައެވެ. މިއީ ދެ މަހަށް ވެސް ނުފުދޭ މިންވަރެކެވެ. އަދި މިއީ ބައިނަލްއަގުވާމީ މިންގަނޑު ކަމަށްވާ ބައިނަލްއަޤްވާމީ މިންގަނޑުތަކުން ލަފާދޭ މަދުވެގެން ތިން މަސްދުވަހުގެ އިމްޕޯޓަށް ބޭނުންވާ މިންވަރަށް ވުރެ ވެސް ދަށް އަދަދެކެވެ. 

އަނެއްކޮޅުން މި އަހަރަކީ 600 މިލިއަނަށް ވުރެ ގިނަ ޑޮލަރުގެ ދަރަނި އަދާކުރަންޖެހޭ އަހަރަކަށް ވާއިރު، މިހާރު ރިޒާވްގައި ހުރި ފައިސާއަކީ އެ ދަރަނިތައް އަދާކުރުމަށާއި، ހަނގުރާމައިގެ ސަބަބުން އުފުލޭ ތެލުގެ އަގުތައް މެނޭޖްކުރުމަށް ފުދޭ ވަރެއް ނޫނެވެ. އަދި ސަރުކާރުން ތައްޔާރުވަމުން އައީ ވެސް މި ހަނގުރާމައަކަށް ނޫނެވެ. ދައްކަން އޮތް ބޮޑު ދަރަންޏަށެވެ. ދައްކަން ޖެހޭ ބިޔަ ބޮޑު ދަރަންޏާ މެދު ދެން އަމަލުކުރާނެ ގޮތެއް ސަރުކާރުން އަދި ހާމަކޮށްފައެއް ނުވެއެވެ.

ކޮވިޑްގެ ހާލަތަށް ވުރެ ގޯސްވެދާނެތަ؟

ރާއްޖޭގެ އިގްތިސާދީ ތާރީހުގައި ކޮވިޑް-19 އަކީ ބޯޑަރުތައް ބަންދުވެ، ފަތުރުވެރިކަން މުޅިން ހުއްޓުމަކަށް އައި “ޓޯޓަލް ޝަޓްޑައުން” އެކެވެ. ނަމަވެސް، މެދުއިރުމަތީގެ މި ހަނގުރާމައިގެ ސަބަބުން ކުރިމަތިވާ އަސަރުތައް ކޮވިޑާ ތަފާތުވަނީ އެއީ ވަކި ސަތަހައްދަކަށް” ހާއްސަވެފައިވާ ކާރިސާއަކަށް ވާތީއެވެ. ކޮވިޑްގެ ވަގުތުގައި ދުނިޔޭގެ ބާޒާރުގައި ތެލުގެ އަގު ރެކޯޑް މިންވަރަކަށް ދަށަށް ދިޔައިރު، މި ހަނގުރާމައިގައި ތެލުގެ އަގު އުފުލިގެން ދިއުމަކީ ރާއްޖެ ފަދަ ގައުމަކަށް ކޮވިޑަށް ވުރެ ބޮޑު މާލީ ބުރައަކަށް ވާނެ ކަމެކެވެ.

ކޮވިޑްގައި ދިމާވީ މީހުން އައުން ހުއްޓުމުގެ މައްސަލައެވެ. ނަމަވެސް މި ހަނގުރާމައިގައި ދިމާވަނީ މީހުން އައުމުގެ ޚަރަދު (ޓިކެޓް އަގު) ބޮޑުވުމާއި، ގައުމަށް ބޭނުންވާ ތަކެތި އެތެރެކުރުމުގެ ހަރަދު އިންތިހާއަށް އުފުލުމުގެ މައްސަލައެވެ. އެހެންނަމަވެސް، ކޮވިޑްގައި ރާއްޖޭގެ ދަރަނި އިތުރުވެފައި އޮތް މިންވަރުން، މި ހަނގުރާމައިގެ ސަބަބުން އިތުރުވާ ހަރަދުތައް ބަރޯސާކުރަން ޖެހެނީ ކުރިއަށް ވުރެ މާ ނާޒުކު މާލީ ބިންގަލެއްގެ މަތީގައެވެ.

ކުރުގޮތަކަށް ބުނާނަމަ، ކޮވިޑަކީ އިގްތިސާދީ “ހުއްޓުމެކެވެ”. މި ހަނގުރާމައަކީ އިގްތިސާދީ “ބުރައެކެވެ”. ކޮވިޑުން އަރައިގަތުމަށް ބޭނުންވީ ބޯޑަރު ހުޅުވާލުމެވެ. ނަމަވެސް މި ހަނގުރާމައިގެ އަސަރުން ސަލާމަތްވުމަށް ބޭނުންވަނީ ތެލަށް ބަރޯސާވާ މިންވަރު ކުޑަކުރުމާއި، ދުނިޔޭގެ ބާޒާރުގައި މުދަލުގެ އަގު އުފުލުމުން އަންނަ “އިންފްލޭޝަން” އާ ކުރިމަތިލާނެ މާލީ ތަނަވަސްކަމެވެ.

އިގްތިސާދު ދިރާސާކުރާ ބައެއް ފަރާތްތަކުން އަންދާޒާކުރާ ގޮތުން ނަމަ މި ދަނޑިވަޅުގައި މި ހަނގުރާމަކުރުމަކި ކޮވިޑްގެ ހާލަތަށް ވުރެ ވެސް ރާއްޖެ އަށް ނުރައްކާ ބޮޑު ކަމަކެވެ. ހާއްސަކޮށް ހަނގުރާމަ ދެމިގެން ގޮސްފި ނަމައެވެ.

ހަރަދު ކުޑަކުރުން މުހިންމު!

ދިވެހިންގެ ބަދުނަސީބު ކަމެއް ނޭނގެއެވެ. ދަރަނީގެ ބޮޑު ޕޭމަންޓެއް ދައްކަންޖެހިފައި އޮތް މި ދަނޑިވަޅާއި މެދު އިރުމަތީގެ ހަނގުރާމަ ދިމާވެފައި މި ވަނީ ރޯދަ މަހުގެ އިތުރުން ބޮޑު އިންތިހާބެއްގެ ކެމްޕެއިން ކުރިއަށްދާ ދަނޑިވަޅެއްގައެވެ. ރޯދަމަކީ އާންމުން ދިރިއުޅުމުގެ ހަރަދުތައް އިންތިހާ އަށް ބޮޑުވާ ދުވަސްވަރެކެވެ. ކާބޯތަކެތީގެ އަގު ވަނީ އުފުލިފައެވެ. އަދި ހަރަދުތައް ކުޑަކުރުމަކީ ވެސް ދަތި ކަމެކެވެ. 

އަނެއްކޮޅުން އޭޕްރީލް 4 ވަނަ ދުވަހު ބާއްވާ ލޯކަލް ކައުންސިލްތަކުގެ އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ އިންތިހާބުގެ އިތުރުން ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމާ މެދު އާންމުންގެ ހިޔާލު ހޯދުމުގެ ވޯޓުގެ ކެމްޕެއިން ވަނީ ފެށިފައެވެ. އިންތިހާބަށް ސަރުކާރުން ވެސް އަދި އިދިކޮޅު ފަރާތްތަކުން ވެސް ބޮޑު ހޭދައެއް ކުރެއެެވެ. ސިޔާސީ ހަރަދުތައް ބޮޑުކަމުން މިހާރު ވެސް ސަރުކާރަށް ފާޑުކިޔުން އަމާޒުވެފައި ވެއެވެ. އަދި އިންތިހާބާ ދިމާކޮށް ވަޒީފާތައް ދިނުން އިތުރުވުމަކީ ވެސް ދައުލަތުގެ ބަޖެޓަށް ބާރު ބޮޑުވާނެ ދަނޑިވަޅެކެވެ. 

މިހުރިހާ ކަމެއް މިހެން ހުރި ނަމަވެސް ސަލާމަތްތެރިކަން އޮތީ ގައުމީ އަދި ފަރުދީ ފެންވެރެއްގައި ވެސް ހަރަދު ކުޑަކޮށްގެންނެވެ. ދައުލަތުގެ މުއްބާރުކޮށްގެންނެވެ. ބޭކާރު ހަރަދުތައް ހުއްޓާލައި ސިޔާސީ ވަޒީފާތައް އިތުރުކުރުން ވެސް ހުއްޓާލަންޖެހެއެވެ. އިންތިހާބަށް ޖަހާ “ކަޑަތަކުން” ވެސް ދައުލަތުގެ ބަޖެޓަށް ބާރު ބޮޑުވާނެއެވެ. އެހެންކަމުން މިކަންކަން ވެސް މަޑުޖައްސާލަންޖެހެއެވެ. 

މީގެ އިތުރުން ހަމައެކަނި ޓުއަރިޒަމަށް ބަރޯސާވެފައި އޮތް އޮތުން އަވަސް މުސްތަގުބަލެއްގައި ބަދަލުވާންޖެހެއެވެ. ޓްރާންޝިޕްމަންޓް ބަނދަރުފަދަ ދުވަސްވީ ހުވަފެންތައް ހަގީގަތަކަށް ހެދޭތޯ މަސައްކަތް ކުރަންޖެހެއެވެ. ކަނޑުގެ ދިރުންތަކުން ލިބިފައިވާ މުއްސަނދިކަން ބޭނުންކޮށްގެން ލިބޭނެ މަންފާތައް އިތުރުކުރުމަށް މިހާރަށް ވުރެ ސީރިއަސް ކަމާ އެކު މަސައްކަތްތަކެއް ކުރަން އެބަޖެހެއެވެ. 

​​މެދުއިރުމަތީގެ ހަނގުރާމައިގެ ސަބަބުން ރާއްޖޭގެ އިގްތިސާދީ އުދަރެހަށް ކަޅު ވިލާގަނޑެއް ކުރިމަތިވެފައިވީ ނަމަވެސް، މިއީ ކޮވިޑްގެ ކާރިސާއިން ލިބުނު ފިލާވަޅުތަކުގެ އެހީގައި އިގްތިސާދީ ދިފާއީ ބާރު ވަރުގަދަކުރަންވީ ވަގުތެވެ. މިފަދަ ބައިނަލްއަގުވާމީ ލޮޅުންތަކުން ސަލާމަތްވުމަށްޓަކައި ހަރަދުތައް ކުޑަކޮށް، އިގްތިސާދީ ސިންދަފާތުކުރުން އަވަސްކުރަންޖެހެއެވެ.  މިއީ ހަމައެކަނި ސަރުކާރަށް އޮތް އިމްތިހާނެއް ނޫނެވެ. މިއީ ބޭރުގެ ވަސީލަތްތަކަށް ބަރޯސާވުން ކުޑަކޮށް، އަމިއްލަ ފައިމައްޗަށް ތެދުވުމަށް މުޅި ގައުމަށް ލިބުނު ފަހުގެ އިންޒާރެވެ. މި ހަނގުރާމައަކީ ހަމައެކަނި ދުރުގައި ހިނގާ އަސްކަރީ ކުޅިވަރެއް ނޫނެވެ. ލިބޭ މިންވަރަކުން ހަރަދުތައް ފޫބެއްދުމަށް ގައުމީ އަދި ފަރުދީ ލެވެލްއެއްގައި ވެސް ވިސްނަންވެއްޖެއެވެ.