“ނުގަވައިދުން” އެތައް ސަތޭކަ މިލިއަނެއް ދައުރުކުރާ އިރު މާލީ އިދާރާތައް ނިދާފައި!

ކުޑަ މުސާރައެއް، އެކައުންޓްތަކުގައި މިލިއަނުން!

ޑްރަގް ނެޓްވޯކްތަކަށް އަމާޒުކޮށްގެން މި ފަހުން ފުލުހުން ފެށި އޮޕަރޭޝަންތަކުގެ ތެރެއިން އެނގިގެން ދިޔަ އެއްކަމަކީ އެ ކުށްތަކުގެ ތުހުމަތުކުރެވޭ މީހުންގެ އަކައުންޓްތަކުގައި އެތައް މިލިއަން ރުފިޔާއެއް ދައުރުކޮށްފައިވާ ކަމެވެ. ފުލުހުން ހާމަކުރި ގޮތުން ނަމަ 300 މިލިއަނަށް ވުރެ ގިނަ ރުފިޔާ އާއި ހަތަރު ލައްކަ އަށް ވުރެ ގިނަ ޑޮލަރު އެ މީހުންގެ އެކައުންޓްތަކުގައި ދަުއުރުކޮށްފައި ވެއެވެ. 

އޭގެ ތެރެއިން އެއް މައްސަލައެއްގައި ހިމެނޭ މީހެއްގެ އެކައުންޓްގައި 38.8 މިލިއަން ރުފިޔާ ދައުރުކޮށްފައި ވެއެވެ. އެހެން ނަމަވެސް ސަރުކާރުގެ ސިޔާސީ މަގާމެއްގައި ހުރި އަހްމަދު އަނާމް އިބްރާހީމް އަށް މުސާރައިގެ ގޮތުގައި ލިބިފައި ވަނީ 271،874.32ރ. އެވެ. މި މައްސަލާގައި މި ސަރުކާަރުގެ ސިޔާސީ މަގާމެއްގައި ހުރި އެހެން މީހެއް ކަމަށްވާ ސްޕޯޓްސް މިނިސްޓްރީގެ ސީނިއާ ޕޮލިޓިކަލް ޑިރެކްޓަރު އަލީ ނަދީމްގެ އެކައުންޓްގައި ވެސް 17.1 މިލިއަން ރުފިޔާ ދައުރުކޮށްފައި ވެއެވެ. ނަމަވެސް އޭނާ އަށް މުސާރައިގެ ގޮތުގައި ޖަމާވެފައި ވަނީ ޖުމްލަ 430,638.99ރ. އެވެ. އަދި އެ މައްސަލާގައި ހިމެނޭ އެހެން މީހެއްގެ އެކައުންޓްގައި 6.9 މިލިއަން ދައުރުކޮށްފައިވާ އިރު މުސާރައިގެ ގޮތުގައި ޖަމާވެފައި ވަނީ 371،635.36ރ. ކަމަށް ފުލުހުން ބުންޏެވެ. 

މިއީ ހަމައެކަނި މި މައްސަލާގައި ކަން ހިނގާފައިވާ ގޮތެއް ނޫނެވެ. މީގެ ކުރިން ފުލުހުން އަތުލައިގަތް ބައެއް ބިދޭސީންގެ އެކައުންޓްތަކުގައި ވެސް އެތައް މިލިއަނަކުން ފައިސާ ދައުރުކޮށްފައިވާކަން ހާމަވެފައި ވެއެވެ. މަހު މުސާރަ އަށް 300 ޑޮލަރު ލިބޭ ބިދޭސީ މީހާގެ އެކައުންޓްގައި އެތައް މިލިއަން ރުފިޔާއެއް ދައުރުވެފައި އެބަ ހުއްޓެވެ.

ގިނަ އަދަދަކުން ފައިސާ ދައުރުކުރާތާ އެތައް ދުވަހެއް!

ފުލުހުން ހާމަކޮށްފައިވާ މައުލޫމާތުތަކުން އެނގޭ ގޮތުން ނަމަ މިއީ 2015 ވަނަ އަހަރުން ފެށިގެން މަސްތުވާތަކެތީގެ ވިޔަފާރިކުރަމުން ދާ ބައެކެވެ.  މި ނެޓުވޯކުގައި އިސްކޮށް ހަރަކާތްތެރިވާ ފަރާތްތަކަށް އަމާޒުކޮށް ހާއްސަ ތަހުގީގެއް ފެށީ މިދިޔަ އަހަރުގެ މާޗު މަހު ކަމަށް ފުލުހުން ބުނެފައި ވެއެވެ. މާނައަކީ ތަހުގީގީ އިދާރާތަކަށް ނޭނގި އެތައް އަހަރުތަކެއް ވަންދެން މި ވިޔަފާރި ކޮށްފި ކަމެވެ. 

މިހާ ދުވަސްވާ އިރު ތަހުގީގީ އިދާރާތަކަށް ނޭނގުނު ނަމަވެސް މާލީ އިދާރާތަކުގެ ރާޑަރުން މިކަންކަން ކައްސާލުމަކީ ވެގެން ވާނެ ގޮތެއް ނޫނެވެ. ގޮތް ނޭނގޭ ފައިސާގެ މުއާމަލާތްތައް ބޭންކިން ނިޒާމުގެ ތެރެއިން ހިންގާ ނަމަ އެކަން ސަމާލު ކަމަށް ގެނައުމަކީ އެ ބޭންކްތަކުގެ ވެސް ޒިންމާ އެކެވެ. އޭގެ އިތުރުން މަރުކަޒީ ބޭންކް ކަމަށްވާ މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގައި ފައިނޭންޝަލް އިންޓެލިޖެންސް ޔުނިޓް (އެފްއައިޔޫ)ގެ ނަމުގައި މި ފަދަ ކަންކަމަށް ހާއްސަ ޔުނިޓެއް ވެސް އޮވެއެވެ. އެހެން ނަމަވެސް މިއިން ކަމެއް މި ޔުނިޓަށް ފާހަގަ ނުވަނީ ބާއެވެ؟

މަނީ ލޯންޑަރިންނާއި ނަހަމަ ގޮތުގައި ހޯދާ ފައިސާ ބޭންކްތަކުގައި ދައުރުވުމަކީ އާންމު ކަމެކެވެ. ހާޢްސަކޮށް ރާއްޖޭގައި މިކަން ވަރަށް ބޮޑަށް އާންމު ވެފައި ވެއެވެ. މީގެ ކުރީގެ ހާދިސާތަކަށް ބަލާއިރު މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ތެރެއިން 2013 އިން 2015 އަށް ހިންގި ހިޔާނާތުގެ މުއާމަލާތްތަކުގައި ވެސް ފައިސާ ދައުރުކޮށްފައި ވަނީ ބޭންކިން ނިޒާމުގެ ތެރެއިންނެވެ. އެހެން ނަމަވެސް އެއީ ސަރުކާރުގެ އިސް މަގާމުތަކުގައި ތިބި ފަރާތްތަކުގެ ކަމަކަށްވާތީ ބޭންކުގެ ތެރެއިން އެފަދަ މުއާމަލާތެއް ހިންގުމަކީ އުނދަގޫ ކަމަކަށް ނުވެދާނެއެވެ. އެހެން ނަމަވެސް ރަނގަޅު ނިޒާމެއްގެ ދަށުން ކަންކަން އޮތް ނަމަ އެފަދަ ކަމަކަށް ޖާގަ ދެވިގެން ނުވާނެއެވެ.

މަސްތުވާތަކެތީގެ ވިޔަފާރި އެތައް ބިލިއަނަކުން!

ރާއްޖެއަކީ ކުޑަ އާބާދީއެއް ނަމަވެސް މަސްތުވާތަކެތީގެ މައްސަލަ އިންތިހާ އަށް ބޮޑު ގައުމެކެވެ. މީގެ އިތުރުން ބައެއް ގައުމުތަކުން މަސްތުވާތަކެތި ޓްރެފިކްކުރުމަށް ޓްރާންސިޓް ބަނދަރެއްގެ ގޮތުގައި ވެސް ބޭނުން ކުރެއެވެ. ރާއްޖޭގެ އެކި ސަރަހައްދުތަކުން ޓަނު ޓަނުން ފެނިފައިވާ މިފަދަ ޝިޕްމެންޓްތަކުން އެކަމަށް ހެކި ދެއެވެ. އެހެންކަމުން މި ވިޔަފާރީގެ މުއާމަލާތްތައް ގުނެނީ މިލިއަނަކުން ވެސް ނޫނެވެ. މިއީ އެތައް ބިލިއަން ރުފިޔާގެ ވިޔަފާރިއެކެވެ. 

ފުލުހުންގެ ތަފާސް ހިސާބުތަކުން ވެސް މި ވިޔަފާރި ރާއްޖޭގައި ފެތުރިފައި އޮތް މިންވަރު ދައްކުވައިދެއެވެ. މިދިޔަ މަހުގެ ތެރޭގައި ފުލުހުން ބޭއްވި ނޫސްވެރިންގެ ބައްދަލުވުމެއްގައި ޗީފް އިންސެޕްޓަރ އޮފް ޕޮލިސް އަޙްމަދު ނާއިފް ވިދާޅުވެފައި ވަނީ ފަހަކަށް އައިސް ސަރަހައްދީ ގައުމުތަކުގައި ދިވެހިން ގާއިމުވެ ތިބެގެން ރާއްޖެއަށް މަސްތުވާތަކެތި ފޮނުވުމުގެ މަސައްކަތް ކުރަމުންދާކަން ފާހަގަކުރެވިފައިވާކަމަށާއި އެގޮތުން އެއަރކާގޯ އާއި ސީކާގޯ މެދުވެރިކޮށް އަދި އިލެކްޓްރިކް ސާމާނުތަކުގައި މަސްތުވާތަކެތި ފޮރުވައިގެން ފޮނުވަމުންދާކަމަށެވެ. މާނައަކީ މިއީ ބައިނަލްއަގުވާމީ ފެންވަރެއްގައި ހިންގާ ކަމެކެވެ. 

ފުލުހުން ހާމަކުރި ތަފާސް ހިސާބުތަކުން ދައްކާ ގޮތުން ނަމަ މިދިޔަ އަހަރު އެކަނި ވެސް މަސްތުވާތަކެތީގެ ވިޔަފާރިއާ ގުޅޭ އޮޕަރޭޝަންތަކުގައި އަތުލައިގަނެފައިވާ މަސްތުވާތަކެތީގެ އަގު 875 މިލިއަން ރުފިޔާ އަށް ވުރެ މައްޗަށް އަރައެވެ. މިއީ މި ވިޔަފާރީގެ ކުޑަ މިންވަރެކެވެ. ބިލިއަނަކާ ގާތްކުރާ އަދަދެއްގެ މަސްތުވާތަކެތި އަތުލައިގަނެފައިވާ އިރު އަތުލައި ނުގަނެވި ކުރާ ވިޔަފާރީގެ އަގު ކިޔާ ބޮޑުވާނެ ހެއްޔެވެ؟

ފުލުހުން މި ފަހުން އާންމުކުރި މައުލޫމާތުތަކުން އެނގުނު އެއް ކަމަކީ މަސްތުވާތަކެތީގެ ވިޔަފާރީގައި ބޭންކިންގ ނިޒާމު ބޭނުންކުރަމުން ދާ ކަމެވެ. އަދި މިއީ ކަމާ ބެހޭ އިދާރާތަކުން ސަމާލުކަން ދީފި ނަމަ ފަސޭހަ ކަމާ އެކު ދެނެގަނެވިދާނެ މުއާމަލާތްތަކެއް ކަމެވެ. ފުލުހުން މިހާރު ވެސް އަންނަނީ މިފަދަ އެތައް އެކައުންޓެއްގެ މައުލޫމާތު ދިރާސާކުރަމުންނެވެ. އެންމެ ފަހުން ހިންގި އޮޕަރޭޝަނާ ގުޅިގެން ކޯޓު އަމުރެއްގެ ދަށުން މިހާތަނަށް 13 ފަރާތެއްގެ 53 ބޭންކު އެކައުންޓު ފްރީޒްކޮށްފައިވާ ކަމަށް ވެސް ފުލުހުން ބުނެއެވެ.

މާލީ އިދާރާތައް ހުށިޔާރު ވާންޖެހޭ!

ބައެއް ހާލަތްތަކުގައި ލިބޭ މުސާރަ ނުވަތަ އާމްދަނީ އަށް ވުރެ ބޮޑު އަދަދެއް ޖަމާވެއްޖެ ނަމަ އެ ފައިސާ ބޭންކްގައި ހިފެހެއްޓުމަކީ އާންމު ކަމެކެވެ. ވަރަށް ގިނަ ވިޔަފާރިތަކަށް މި މައްސަލަ ކުރިމަތިވެ އެވެ. މިފަދަ ހާލަތްތަކުގައި ފައިސާ ދޫކުރަނީ ވެސް އެ ފައިސާ ހޯދި ގޮތުގެ ތަފްސީލު ބޭންކަށް ހުށަހެޅުމުންނެވެ. އަދި ބައެއް ފަހަރު މިއީ ކުދި އަދި މެދުފަންތީގެ ވިޔަފާރިތަކަށް ކުރިމަތިވާ ވަރަށް ބޮޑު ދައްޗަކަށް ވެސް ވެފައި އޮތް ކަމެކެވެ. 

ސުވާލަކީ މަސްތުވާތަކެތީގެ ބޮޑެތި ނެޓްވޯކްތަކުގައި އާންމު ވަޒީފާއެއްގައި އުޅޭ މީހަކު މިހާ ގިނަ ފައިސާ ދައުރުކުރި އިރު މާލީ އިދާރާތައް އޮތީ ނިދާފައި ހެއްޔެވެ؟ މިއީ ކުޑަ މިންވަރެކެވެ. މިފަދަ އެތައް ނެޓްވޯކްތަކެއް އެބަ ހިންގައެވެ. ބޭންކްތައް މެދުވެރިކޮށް މި ފައިސާ ދައުރު އެބަ ކުރެއެވެ. ހޯދި ގޮތެއް ނޭނގޭ އެތައް މިލިއަން ރުފިޔާއެއް ބޭންކްތަކުގެ ތެރެއިން ދައުރުކުރާ އިރު، ތަހިގީގީ އިދާރާތަކުގެ ސަމާލުކަމަށް މިކަންކަން ނުގެންނަނީބާ އެވެ؟ ނުވަތަ ސަމާލު ކަމަށް ގެނަޔަސް ތަހުގީގީ އިދާރާތަކަށް އެކަށީގެންވާ ފިޔަވަޅު ނޭޅެނީބާ އެވެ؟