ދެ އިންތިހާބު އެއް ދުވަހެއްގައި: ނުކުންނާނީ ކޮން ނަތީޖާއެއް؟
7 މާޗް 2026 - 13:01
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމުގެ ވާހަކައަކީ ރާއްޖޭގެ ސިޔާސީ މައިދާނުގައި މިހާރު އެންމެ ހޫނުކޮށް ދެކެވެމުންދާ އެއް ވާހަކައެވެ. އިގްތިސާދީ ގޮތުން ގައުމު އޮތް ހާލަތުގެ ގޮތުން ދައުލަތުގެ ހަރަދު ކުޑަކުރުމުގެ ނިޔަތުގައި މިކަން ކުރަން ސަރުކާރުން ހުށަހެޅި ނަމަވެސް، މިއީ ޑިމޮކްރެޓިކް ނިޒާމަށް އަންނާނެ ވަރަށް ބޮޑު ބަދަލެކެވެ.
ފާހަގަކޮށްލެވޭ ބައެއް ތަފާސްހިސާބުތައް
އައު ގާނޫނުއަސާސީގެ ދަށުން، ރާއްޖޭގައި ރިޔާސީ އިންތިހާބާއި މަޖިލިސް އިންތިހާބު ބާއްވަމުން އަންނަނީ ދެ ދުވަސްވަރެއްގައެވެ. އާންމު ގޮތެއްގައި ރިޔާސީ އިންތިހާބު ސެޕްޓެމްބަރު މަހު ބާއްވާއިރު، މަޖިލިސް އިންތިހާބު ބާއްވަނީ ޖެހިގެން އަންނަ އަހަރުގެ މާރޗު ނުވަތަ އޭޕްރީލް މަހުގެ ތެރޭގައެވެ.
- ޚަރަދުގެ ނިސްބަތް: 2023 ވަނަ އަހަރުގެ ރިޔާސީ އިންތިހާބަށް ދައުލަތުގެ ބަޖެޓުން ގާތްގަނޑަކަށް 130 މިލިއަން ރުފިޔާ ހަރަދުވިއެވެ. އަދި 2024 ވަނަ އަހަރުގެ މަޖިލިސް އިންތިހާބަށް ގާތްގަނޑަކަށް 120 މިލިއަން ރުފިޔާ ހަރަދުވިއެވެ. ދެ އިންތިހާބު ވަކިން ބޭއްވުމަށް ގާތްގަނޑަކަށް ކުޑަ ދުވަސްކޮޅެއްގެ ތެރޭގައި 250 މިލިއަނަށް ވުރެ ގިނަ ރުފިޔާ ދައުލަތުން ހަރަދުކުރެއެވެ.
- ވޯޓުލާ މީހުންގެ ނިސްބަތް: ރާއްޖޭގައި އަބަދު ވެސް ރިޔާސީ އިންތިހާބުތަކުގައި ވޯޓުލާން ނުކުންނަ މީހުންގެ ނިސްބަތަކީ ގާތްގަނޑަކަށް 85- 89 ޕަސެންޓެވެ. މަޖިލިސް އިންތިހާބުތަކުގައި ވޯޓުލާން ނުކުންނަ މީހުންގެ ނިސްބަތް އުޅެނީ ގާތްގަނޑަކަށް 75 – 79 ޕަސެންޓަ ދެމެދުގައެވެ.
- ސިޔާސީ ޓްރެންޑް: ތާރީހަށް ބަލާއިރު، 2009 ފިޔަވައި، ދެން އައި ކޮންމެ ފަހަރަކު (2014، 2019، 2024) މަޖިލީހުގެ މެޖޯރިޓީ ހޯދާފައި ވަނީ އެ ދުވަސްވަރަކު ވެރިކަމަށް އައި ޕާޓީއަކުންނެވެ.
ދެ އިންތިހާބު އެއްކޮށްލުމުން ލިބޭނެ ފައިދާތައް
- ދައުލަތުގެ ބަޖެޓުން ކުރާ ހަރަދު އިންތިހާއަށް ކުޑަވުން:
މިއީ މިކަމުގެ އެންމެ ބޮޑު ފައިދާއެވެ. ތަފާސްހިސާބުތަކުން ފެންނަ ގޮތުގައި ދެ އިންތިހާބު އެއް ދުވަހެއްގައި ބާއްވައިފި ނަމަ، ވޯޓު ފޮށިތައް ފޮނުވުމަށާއި، އޮފިޝަލުންނަށް މުސާރަ ދިނުމަށް އަދި ސެކިއުރިޓީއަށް ކުރާ ހަރަދުތަކުން ގާތްގަނޑަކަށް 100 ނުވަތަ 120 މިލިއަން ރުފިޔާ ސަލާމަތްކުރެވޭނެ ކަމަށް ލަފާކުރެވެއެވެ. މިއީ ސަރުކާރުން ވެސް އެންމެ ބޮޑަށް ޕްރޮމޯޓްކުރާ ވާހަކައެވެ. ހަމައެކަނި އިންތިހާބު ބޭއްވުމަށް ދާ ހަރަދުގެ އިތުރުން ސިޔާސީ ޕާޓީތަކުން ކެމްޕެއިންތަކަށް ކުރާ ހޭދައިން ވެސް ބޮޑު ބައެއް ސަލާމަތް ވާނެއެވެ. ނަމަވެސް ސުވާލަކީ ޑިމޮކްރަސީގެ މުހިންމު ބަދަލެއް ގުރުބާންކުރުމުގެ އަގު އަޅާކިޔުން ރަނގަޅު ހެއްޔެވެ؟
- މަޖިލިސް އިންތިހާބުގައި ވޯޓުލާ މީހުން ގިނަވުން:
ރިޔާސީ އިންތިހާބުގެ ފޯރީގައި ރައްޔިތުން ވޯޓުލާން ނުކުންނަ މިންވަރު މަތިވާތީ، އޭގެ ފައިދާ މަޖިލިސް އިންތިހާބަށް ވެސް ކުރާނެއެވެ. މީގެ ސަބަބުން މަޖިލީހަށް އިންތިހާބުވާ މެންބަރުންނަކީ ގިނަ ރައްޔިތުންގެ ވޯޓާ އެކު އިންތިހާބުވާ މެންބަރުންނަށް ވުމުގެ ފުރުސަތު ބޮޑުވާނެއެވެ.
އެންމެ ބޮޑު ދެ އިންތިހާބު އެކުއެކީގައި ބޭއްވުމަކީ އެކަމުގެ ފޯރި ގަދަވާނެ ކަމެކެވެ. އަދި ހާއްސަކޮށް ރިޔާސީ އިންތިހާބެއް ބާއްވާ ދުވަސްވަރު މުޅި ގައުމު އެކަމުގައި ސާމިލްވެ އުޅޭތީ އޭގެ ރަނގަޅު ފައިދާ މަޖިލިސް އިންތިހާބަށް ވެސް ކުރާނެއެވެ. ރާއްޖޭގެ އެންމެ ގިނަ ބަޔަކު ވޯޓު ލަނީ ވެސް ރިޔާސީ އިންތިހާބުގައެވެ. އެހެންކަމުން ދެ އިންތިހާބު އެކު އެކީގައި ބޭއްވުމުން މަޖިލީހަށް މެންބަރުން ހޮވުމުގައި ރައްޔިތުންގެ ބައިވެރިވުން އިތުރުވާނެއެވެ.
- ސިޔާސީ އަދި އިހްތިސާދީ ހަމަޖެހުން:
ކުރު މުއްދަތެއްގެ ތެރޭގައި ތަކުރާރުކޮށް ކެމްޕެއިންތައް ބޭއްވުމަކީ ވިޔަފާރިތަކަށާއި އާންމު ދިރިއުޅުމަށް ދަތިވާ ކަމެކެވެ. މަގުމަތީގެ ހަރަކާތްތައް ގިނަވެ ހަލަބޮލުވުމަކީ ވިޔަފާރިތަކާއި އިގްތިސާދީ ކަންކަމަށް ވެސް އޭގެ ނޭދެވޭ އަސަރުކުރާ ކަންތައްތަކެވެ. ދެ އިންތިހާބު އެކުއެކީގައި ނިންމާލުމުން، ގައުމު ހަލަބޮލިވާ މިންވަރު ކުޑަވެ، ސަރުކާރަށް އަވަހަށް މަސައްކަތްތައް ފެށުމުގެ ފުރުސަތު ލިބިގެންދާނެއެވެ.
މީގެ ކުރިން ކަން ހިނގާ ގޮތުން ނަމަ އަހަރުގެ ފަހުކޮޅު އާ ސަރުކާރެއް ވެރިކަމަށް ހޮވި ނަމަވެސް މަޖިލީސް ނިމެނީ އަށެއްކަ މަސް ފަހުން ކަމަށް ވުމުން އާ ސަރުކާރަށް ދަތިތަކެއް ހުރެއެވެ. އެ ގޮތުން ސަރުކާރުން ބޭނުންވާ ބައެއް ކަހަލަ ގާނޫނީ ބަދަލުތައް ގެނައުމާއި ބަޖެޓް ފާސްކުރުމުގައި ވެސް ސަރުކާރަށް ހުރަސްތައް ކުރިމަތިވެއެވެ. އޭގެ އެންމެ ބޮޑު އެއް މިސާލަކީ 2023 ވަނަ އަހަރުގެ ފަހުކޮޅު އެމްޑީޕީގެ ވެރިކަން ނިމި ޑރ. މުހައްމަދު މުއިއްޒު ވެރިކަމަށް ވަޑައިގެންނެވި ނަމަވެސް ޖެހިގެން އައި އަހަރުގެ ބަޖެޓް ފާސްކުރަން އޮތް މަޖިލީހުގައި އިދިކޮޅު މެޖޯރިޓީ އޮތުމެވެ. ނަތީޖާއަކަށްވީ އައު ސަރުކާރުން އެންމެ ބޭނުންވި ގޮތަށް ބަޖެޓަށް ބަދަލު ނުގެނެވުމެވެ. އެ އަހަރު ސަރުކާރުން ރޭވި ގިނަ ކަންކަން ނުވީ ބަޖެޓް އެކުލަވައިލުމަށް ފުރުސަތު ނުލިބުމުން ކަމަށް ރައީސް މުއިއްޒު ވެސް އަދި ވެރިކަން ކުރާ ޕާޓީން ވެސް ބުނެފައި ވެއެވެ.
މގެ އިތުރުން އާ ސަރުކާރެއް އައި ނަމަވެސް އިދިކޮޅުގައި ސުޕަ މެޖޯރިޓީ އޮތް ހާލަތެއްގައި ސަރުކާރެއް ބަދަލުކުރުމުގެ ފުރުސަތު ވެސް އިދިކޮޅު ފަރާތްތަކަށް ލިބެއެވެ. އަށް މަހެއްހާ ދުވަހުގެ ތެރޭގައި ރައީސްގެ އިތުބާރު ނެތްކަމުގެ ވޯޓެއް ނަގައި ސަރުކާރުން ބަދަލުކުރުމެވެ. ނިމިދިޔަ 19 ވަނަ މަޖިލީހުގެ ފަހުކޮޅު އެފަދަ އަޑުތަކެއް ވެސް ފެތުރުނެވެ. އެ އަޑުތައް ކެނޑިގެން ދިޔައީ އޭރު އިދިކޮޅުގައި ތިއްބެވި ގިނަ އަދަދެއްގެ މެންބަރުންތަކެއް ސަރުކާރާ ގުޅުނު ހިސާބުންނެވެ.
ދެ އިންތިޚާބު އެއްކޮށްލުމުން ކުރިމަތިވާނެ ގޮންޖެހުންތައް
- ޖަވާބުދާރީކުރުވުން ބަލިކަށިވުން:
ދެ އިންތިހާބު އެއްކޮށް ބާއްވައިފި ނަމަ، ރައްޔިތުން ވޯޓުލުމުގައި އެންމެ ބޮޑަށް ވިސްނާނީ ރިޔާސީ ކެންޑިޑޭޓަށެވެ. މީގެ ނަތީޖާއަކަށް ވާނީ، މަޖިލީހަށް ކުރިމަތިލާ ކެންޑިޑޭޓުގެ ގާބިލުކަމަށް ބެލުމެއް ނެތި، ތިމާ ތާއީދުކުރާ ރިޔާސީ ކެންޑިޑޭޓުގެ ޕާޓީއަށް އޮޓަމެޓިކުން ވޯޓު ދެވުމެވެ. މީގެ ސަބަބުން ސަރުކާރަށް މަޖިލީހުގެ ސުޕަރމެޖޯރިޓީ ލިބި، ސަރުކާރު ޖަވާބުދާރީކުރުވުމުގެ ބާރު އެއްކޮށް ގެއްލިގެންދިއުމުގެ ބިރު ބޮޑެވެ.
މިހާރު ވެސް މަޖިލީހުގައި އޮތީ ސަރުކާރުގެ ސުޕަ މެޖޯރިޓީއެވެ. އެހެންކަމުން ހަގީގަތުގައި އެކަށީގެންވާ މިންވަރާ ގާތަށް ވެސް ސަރުކާރު ޖަވާބުދާރީއެއް ނުކުރެވެއެވެ. އިދިކޮޅު އެމްޑީޕީގައި ތިއްބެވި 12 މެންބަރުންނަށް ކުރެވޭ މާ ބޮޑު ކަމެއް ނޯވެއެވެ. ގިނަ ކަންތައްތަކެއް ހުށަހެޅި ނަމަވެސް މަޖިލީހުގެ ތަޅުމުގައި ބަހުސްކޮށްލެވެނީ ވެސް މަދު ކަމެއްގައެވެ. ވަޒީރުންނާ ސުވާލުކުރުމުގައި ވެސް އޮތީ މި ދައްޗެވެ. ގާނޫނުގައި ބުނާ މުއްދަތު ފަހަނަ އަޅައި ދާއިރު ވެސް ވަޒީރުން މަޖިލީހަށް ހާޒިރުނުކުރެވުމާއި ހާޒިރުކުރުމުން ވެސް ސަރުކާރަށް ތާއީދުކުރާ މެންބަރުން އެ ބަހުސެއް ހިސޯރުކުރުން ފަދަ ކަންކަން ދަނީ ފެންނަމުންނެވެ.
- ރަށްރަށުގެ ހާއްސަ މައްސަލަތައް އޮބިގެންދިއުން:
މަޖިލިސް އިންތިހާބަކީ ވަކިވަކި ރަށްރަށާއި ދާއިރާތަކުގެ ތަރައްގީ އާއި ކަންބޮޑުވުންތަކަށް ހާއްސަ އިންތިހާބެކެވެ. މަޖިލިސް އިންތިހާބާ އެކީގައި ރަށްރަށުގެ ތަރައްގީގެ ގިނަ މަޝްރޫއުތަކެއް ހަލުވިކަމާ އެކު ކުރިއަށް ދެއެވެ. އަދި އެކަމުގައި މެންބަރުން އުޅޭ މިންވަރު ވެސް އިތުރުކަން ފާހަގަކުރެވެއެވެ. މަޖިލީހުގެ ތަޅުމުގައި ރަށް ނުވަތަ ދާއިރާގެ ވާހަކަ ދެއްކޭ މިންވަރު ވެސް އެފަދަ ދުވަސްވަރެއްގައި ގިނަކަން ފާހަގަކުރެވެއެވެ.
ނަމަވެސް ރިޔާސީ އިންތިހާބަކީ މުޅި ގައުމުގެ ބޮޑެތި މައްސަލަތަކަށް ބިނާވާ އިންތިހާބަކަށް ވުމުން، ދެ އިންތިހާބު އެއް ދުވަހެއްގައި ބޭއްވުމަށް ކެމްޕެއިންތަކުގައި ރަށްރަށުގެ މައްސަލަތަކަށް ދެވޭ ސަމާލުކަން ކުޑަވެގެންދާނެއެވެ. އާންމު ގޮތެއްގައި މި ފަދަ މަޝްރޫއުތަކަށް އަހައްމިއްޔަތުކަން ދެވެނީ އިންތިހާބުތަކާ ދިމާކޮށެވެ. މިހާރު ނަމަ ރިޔާސީ އިންތިހާބާއި މަޖިލީހުގެ އިންތިހާބާއި އަދި ކައުންސިލް އިންތިހާބު ދައުރުގެ ތިން ހިސާބެއްގައި ބާއްވާތީ އެފަދަ މަޝްރޫއުތަކުގެ ވާހަކަ ދެއްކުމަށް ލިބޭ ފުރުސަތު އއު އިސްލާހާއެކު މަދުވެގެންދާނެއެވެ. އިންތިހާބުތައް މަދުވުމަކީ ރައްޔިތުންގެ އަޑު އިއްވުމަށް ލިބޭ ފުރުސަތު ކުޑަ ވާނެ ކަމެކެވެ. އަދި ރައްޔިތުންގެ ފަރާތުން ވަކާލާތުކުރާ މެންބަރުން އެ ރަށްތަކަށް ދޭ ސަމާލުކަން ވެސް ކުޑަވާނެ ކަމެކެވެ.
- އިދާރީ ހައިޖާނާއި ބާތިލު ވޯޓު ގިނަވުން:
ރާއްޖޭގައި އެއް ފޮށްޓަކަށް ގާތްގަނޑަކަށް 600 މީހުން ވޯޓުލާ އިރު، އެއް ފަހަރާ ދެ ކަރުދާސް ދީގެން ވޯޓުލާން ހެދުމުން ކިއޫތައް ދިގުވެ، ވޯޓުލާ މަރުކަޒުތައް ތޮއްޖެހޭނެއެވެ. 2024އެ ގޮތުން ގެ މަޖިލިސް އިންތިހާބުގައި ގާތްގަނޑަކަށް 4،000 ބާތިލު ވޯޓު ލާފައިވާ އިރު، އެއްފަހަރާ ދެ ވޯޓުލާން ޖެހުމުން އުމުރުން ދުވަސްވީ މީހުންނަށް އޮޅުން އަރައި، ބާތިލު ވޯޓު އިންތިހާއަށް އިތުރުވުމަކީ ވުން ވަރަށް ގާތް ކަމެކެވެ. ނަތީޖާ ގުނުމަށް ވެސް ވަގުތުތަކެއް ހޭދަވާނެ ކަމަށް ބެލެވެއެވެ.
އެކަށީގެންވާ ވަރަށް މައުލޫމާތު ނުދެވޭ!
ރާއްޖޭގެ އެންމެ ބޮޑު ދެ އިންތިހާބު ކަމަށްވާ ރައްޔިތުންގެ މަޖިލީހާއި ރިޔާސީ އިންތިހާބު އެއް ދުވަހެއްގައި ބޭއްވުމަށް ގާނޫނު އސާސީ އަށް ގެންނަންޖެހޭ ބަދަލުތައް އެ ވަނީ ގެނެސްފައެވެ. އެ ބަދަލުތައް ގެނައީ ސަރުކާރުން ހުށަހެޅި ގޮތަށް އެއްވެސް ބަދަލެއް ނުގެނަހެވެ. ގިނަ މުއައްސަސާތަކަކާ އެކު މަޖިލީހުން ބައްދަލުވުންތައް ބޭއްވި ނަމަވެސް އެ ހިޔާލުތަކާ މެދު އެ އިސްލާހު ގެނައުމުގައި ވިސްނީ ކިހާވަރަކަށް ކަމެއް އެނގޭނެ ގޮތެއް ނެތެވެ. ސަބަބަކީ އިނގުރައިދޫ ދާއިރާގެ މެންބަރު އިބްރާހީމް ފަލާހް ހުށަހެޅުއްވި ގޮތަށް އެ އިސްލާހުތައް މަޖިލީހުގެ ސުޕަ މެޖޯރިޓީ ބޭނުންކޮށްގެން ފާސްކޮށްފައި ވުމެވެ.
އިދިކޮޅު ފަރާތްތަކުން ދެކޭ ގޮތުގައި އެފަދަ އިސްލާހެއް ގެނައުމުގެ ކުރިން ކަމާ ބެހޭ އިދާރާތަކުގެ އިތުރުން ރައްޔިތުންގެ ތެރޭގައި ވެސް އެކަށީގެންވާ މިންވަރަކަށް ބަހުސް ކުރެވެން ޖެހެއެވެ. ނަމަވެސް އެ މަރުހަލާއެއް ނުހިނގައެވެ. ހަމައެކަނި އޮންލައިން މެދުވެރިކޮށް ހިޔާލު ހޯދުމަށް ހުޅުވައިލުން ފިޔަވައި އާންމުންގެ ތެރޭގައި އެކަމާ މެދު ދެކޭ ގޮތް ބެލުމަށް އެއްވެސް ހަރަކާތެއް ސަރުކާރުން ވެސް އަދި އިކޮޅު ޕާޓީން ވެސް ހިންގާފައެއް ނުވެއެވެ.
އިސްލާހަށް ފަހު ދެން އޮތީ އެކަމާ މެދު ރައްޔިތުން ދެކޭ ގޮތެއް ބެލުމެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބޭނުންފުޅުވަނީ ރައްޔިތުން އެކަމާ މެދު ދެކޭ ގޮތެއް ބއްލެވުމަށެވެ. އެހެންކަމުން އިލެކްޝަންސް ކޮމިޝަނުން މިހާރު ވަނީ ރައްޔިތުންގެ ހިޔާލު ހޯދުމުގެ ވޯޓެއް ނެގުމަށް ނިންމާފައެވެ. މިކަން ކުރަން ރާވާފައި ވަނީ އަންނަ މަހުގެ 4 ވަނަ ދުވަހު އޮންނަ ކައުންސިލް އިންތިހާބާއި އަންހެނުންގެ ތަރައްގީ އަށް މަސައްކަތްކުރާ ކޮމިޓީ އަށް މެންބަރުން ހޮވުމަށް ބާއްވާ އިންތިހާބާ އެކު އެ ދުވަހުއެވެ. މިއީ ވަރަށް ކުރު މުއްދަތެކެވެ.
އިންތިހާބުތައް އެއްކުލުމުގެ ވާހަކައަކީ މީގެ ކުރިން އެމްޑީޕީން ވެސް ދެއްކި ވާހަކައެކެވެ. އެހެން ނަމަވެސް މިހާރު އެ ޕާޓީން ދެކޭ ގޮތުގައި ސަރުކާރުން އެކަން ކުރަން އުޅެނީ މަކަރުވެރި ހީލަތްތެރި ރޭވުމެއްގެ ދަށުންނެވެ. އަދި އޭގެ މަގުސަދު ގުޅިފައި ވަނީ ރިޔާސީ ދައުރު ދައްމާލުން ކަމަށް ތުހުމަތު ކުރެއެވެ. އަދި މިފަދަ ބޮޑު ބަދަލެއް ގާނޫނު އަސާސީ އަށް ގެންނަންވާނީ ރައްޔިތުންގެ މެދުގައި އެކަށީގެންވާ ގޮތެއްގައި ބަހުސްކުރެވި އެކަށީގެންވާ ވަގުތު ވެސް ދެވި ހޭލުންތެރިކުރުމަށް ފަހު ކަމަށް އެ ޕާޓީން ދެކެއެވެ.
އެހެން ނަމަވެސް ދެން އޮތީ މަހެއްހާ ދުވަހެކެވެ. އަނެއްކޮޅުން މި ދުވަސްކޮޅު ދިމާވެފައި މި ވަނީ ރަމްޟާން މަހާއެވެ. އެހެންކަމުން އެންމެން ވެސް މަސްއޫލުވެގެން އުޅެނީ ދީނީ ކަންކަމާއެވެ. އަނެއްކޮޅުން ކައުންސިލް އިންތިހާބުގެ ކެމްޕެއިންގެ ތެރޭގައި ޕާޓީތައް ވެސް އުޅެންޖެހިފައިވުމުން، މި ބޮޑު ބަދަލާ މެދު ރައްޔިތުން ހޭލުންތެރިކުރުވުމަށް މާ ބޮޑު މަސައްކަތެއް މިހާތަނަށް ނުކުރެވެއެވެ. އެހެންކަމުން ހަރަދު ކުޑަވާނެ ކަމަށް ބުނެ ސަރުކާރުން ދައްކާ ވާހަކަތައް ފިޔަވައި މިކަމުގައި ހުރި ގޮންޖެހުންތަކާއި ފައިދާތަކެއް އާންމު ރައްޔިތު މީހާއަކަށް ނޭނގެއެވެ. އެ ވަގުތެއ ވެސް ނެތެވެ.
ހަރަދު ކުޑަކުރުންތޯ ނުވަތަ ޑިމޮކްރަސީގެ ހަރުދަނާކަންތަ؟
ތާރީހާއި ތަފާސްހިސާބުތަކަށް ބުރަވާއިރު، ދެ އިންތިހާބު އެކުގައި ބޭއްވުމަކީ ދައުލަތުގެ މާލިއްޔަތަށް ލިބޭނެ ވަރަށް ބޮޑު ލުޔެކެވެ. ނަމަވެސް، ސިޔާސީ ގޮތުން މިއީ ވެރިކަންކުރާ ޕާޓީއަކަށް މަޖިލީހުގެ ފުރިހަމަ ކޮންޓްރޯލް ހޯދަން ފަސޭހަވެ، ރައްޔިތުންނަށް އެމީހުންގެ ދާއިރާގެ މެންބަރު ވަޒަންކުރަން ލިބޭ ފުރުސަތު ހަނިވެގެންދާނެ ކަމެކެވެ. މިއީ ސާފުކޮށް ކަނޑައެޅިފައިވާ “ރަނގަޅު” ނުވަތަ “ނުބައި” ޖަވާބެއް އޮތް ކަމެއް ނޫނެވެ. މިއީ އިގްތިސާދީ ފައިދާ އާއި ޑިމޮކްރެޓިކް ހަމަތަކާ ދެމެދު އިހްތިޔާރުކުރަންޖެހޭ ކަމެކެވެ.
ރިއެކްޝަންސް